Ko Te Tuhi tētahi o ngā whare toi matua o Aotearoa e hāpai ana i ngā mahi me ngā tikanga toi hou o nāianei. Ka aronui a Te Tuhi ki ngā toi hou e whai pānga ana ki tēnei hapori, e hāngai ana ki tēnei rohe, e toro atu ana ki te ao whānui. He whare ohaoha motuhake a Te Tuhi e tautokona ana e Te Kaunihera o Tāmaki Makaurau me te Contemporary Art Foundation. Ka ora hoki mātou i tō whakaaro nui mai. Rapua ngā ara e taea ai e koe te tautoko mai ā-pūtea, ki konei. Kāore he utu mō ngā whakaaturanga, e tuwhera ana ō mātou kūaha ki te katoa.


Te hītori o Te Tuhi

Kua puta mai a Te Tuhi i te Pakuranga Arts Society i te tau 1969. Nā Iris Fisher rāua ko Nanette Cameron te kaupapa i kōkiri, ko ngā mema tuatahi o te Society ko Patricia Hunt rātou ko Jean Stewart, ko Jean Thompson, ko Elizabeth Venter, ko Anette McDonald, ko Andrew Venter. Tokomaha rātou i ārahi te whakatūnga o te Pakuranga Community Centre (i te tau 1975) me te Fisher Gallery (i te tau 1984), otirā, ko Lois Perry rāua ko Tā Barry Curtis ētahi. I te tau 2001, ka whakakotahihia te Pakuranga Community Centre me te Fisher Gallery, ka puta ko Te Tuhi. Pānuihia te roanga o ngā hītori mō Te Tuhi ki konei.

Tō mātou ingoa

Nā te iwi o Ngāi Tai te ingoa 'Te Tuhi' i tapa mō tō rātou tupuna, mō Manawatere. Nō tana taenga mai ki Aotearoa ka tuhia e ia tana tohu ki runga i te rakau pōhutukawa mā te karamea. I tēnei wā tonu, kei Tūwakamana, ki Ōwairoa tētahi rākau pōhutukawa ko 'Te Tuhi a Manawatere' te ingoa. Nā Ngāi Tai te rākau i tapa. Kei te tomokanga o Te Tuhi ngā rākau e rua e tū ana, he mea hono mai i te rākau matua i Tūwakamana.