Nō ngā āinga mai o te huarere i roanga o tētahi tau, e whakaatu atu ana ēnei mahinga toi i ngā tohu huarere me ngā matakitenga o te ngākau tangata – te wera, te hau, te pōuri me te totetote o te ua. Ko te huarere – ko te rere, ko te huahua, ko te kōhauhau o Papa. Nā ngā ringatoi nei, kei te kite anō tātou i te wehi o Tāwhirimātea me ētahi atu momo tipua, i a tātou e kaupare atu ana i ngā karawhiuwhiu kino o te huarere – e kīia ana 'me he kōtuku rerenga tahi', heoi, kāore i roa, kua puta mai anō.
He 'tumu huarere' a Huarere: Weather Eye, Weather Ear ki Te Tuhi. He whare e whakapāoho atu ana i ngā 'pūrongo huarere' e ono mā te ipurangi. Mai i te wā o Matariki i te tau 2022, tae atu ki te weheruatanga o te Kōanga me te Ngahuru, tae noa mai ki a tātou o ināianei, i te Ihu o Hinetakurua i te tau 2023. E āia ana te huarere, e whakakorikorihia ana ngā mahinga toi e ngā tipua o Te Moana-nui-a-Kiwa – e whakawhiti ana i ngā ākau o Aotearoa, o Rarotonga, o Hāmoa me Niue. E kōhimuhimu ana, e hāmama ana ngā hau: e piki ake ana, e heke iho ana ngā kupu me ngā tohu ki runga i te mahana me te mākū o te kōhauhau me te waipuketanga o ō tātou motu.
E whakarongo ana tō tātou 'taringa huarere' kl te tangi o ngā manu me te whaititiri – e papā ana, e rere atu ana. Otirā, e whakaohooho ana tō tātou 'mata huarere' i ō tātou tairongo me ngā taputapu mātai huarere a te ao pūtaiao. Nō te putanga mai o te kupu 'awa kōhauhau' ki te iwi whānui, ka pā mai te āwhā, ka rongo ō tātou tinana ki ngā mamae me te hā o te ua ki tētahi taha, me te kapanga o ngā ngaru ā-hiko e ngāoki haere ana i te mata o te pūrere ua ki tētahi atu taha. Kei tēnei whakaaturanga, e huraina mai ana e te orowai, e te kāmera rānei ngā wairua o ngā roto kōpaka me ngā huka ā-tai. E whakahaua ana ngā tira huarere e ngā karawhiu o Tāwhiri me ngā titonga ā-hiko e puta noa mai ana i ngā pūoko ki tawhiti. Ehara i te mea e tū toka noa ana te nuinga o ēnei mahinga toi – kei te whanake haere tonu. He wā tōna ka wairuhi kau ana tātou, he wā anō ka hiki anō te wairua.
Ehara i te mea e whakapāngia anake tātou e te huarere, kei te whakapā atu hoki te tangata ki ngā āhuatanga nei. Waihoki, ehara i te mea kei te utua ngā nama nui o tēnei parekura ki te ao tūroa e te katoa o te hunga tāngata, arā atu anō ngā rironga a te ringa kaha o tēnei aituā nui ki runga i a Papatūānuku: he whenua, he taiao, he kīrere, he tangata. Ko Huarere: Weather Eye, Weather Ear te takoha a Te Tuhi ki te World Weather Network, he whakahaere e tūhonohono ana i ngā whare toi, e 28 te nui, huri noa i te ao, kia āta whakatakotohia e rātou ō rātou wheako mō ngā huarere hou. Hei whakanui i tēnei kāhui, kua tono atu mātou ki a Nujoom Alghanem, he ringatoi nō te whenua o Emirati ki te whakaatu i āna mahi ataata mai i tana pakipūmeka, arā, i Honey, Rain and Dust (2016). Kua tāia ngā wheako o te iwi o Emirati me he kāri pōhi nō āhurangi kē e whakaahua ana i ngā rā roa me ngā rā wera o te Raumati, e tatangi mai ana ngā oro o te kōraha me te hamumu o ngā pī e hāpai ana i te ora.
Links
→ Essay by Janine Randerson
→ List of works
→ About the artists
→ Huarere: Weather Eye, Weather Ear digital programme
→ Huarere: Weather Eye, Weather Ear e-publication