Ko te tumu huarere o Te Tuhi te kaikōkiri o ngā "pūrongo huarere" ā-toi e whai ana i ngā wāhanga o te maramataka Māori. Mai i te pokapū o Te Moana-nui-a-Kiwa kei te whakapāho atu ngā kāhui ringatoi e ono i ngā tohu huarere mai i Aotearoa, i Tonga, i Niue, i Rarotonga me Hāmoa – e whaiwhai haere ana i ngā tohutohu a ngā huringa nui o te āhuarangi. Mai i te wā o Matariki i te marama o Pipiri i te tau 2022, ki te weheruatanga o te Kōanga me te Ngahuru, tae noa ki te marama o Pipiri i te tau 2023 ka whakaputaina e ngā ringatoi, e ngā kaituhi, e ngā hapori me ngā kaimātai hauropi ngā huarere hou nō te wā o te Takiwā Tangata ki tētahi whakaaturanga ā-ipurangi e tū ana ki konei me te pae tukutuku o te World Weather Network. I te marama o Pipiri 2023, ka tū te whakaaturanga o Huarere: Weather Eye, Weather Ear ki Te Tuhi i Tāmaki Makaurau.
E whakaahua mai ana te kupu huarere i te rere o ngā hua katoa e rongo ai tātou ki te kōhauhau o Papatūānuku. Ko te "mata huarere" tō tātou hononga ki ngā taputapu e mātai ana i ngā āhuatanga o te huarere, arā, ko ngā taputapu ā-toi, ā-iwi, ā-pūtaiao me ērā a te kaimautohe. Kei te whakarongo te 'taringa huarere" ki ngā oro o te huarere, mai i ngā pūrere orowai ki roto i ngā roto kōpaka, ki te rere o te hau i ngā hāpa a tētahi tira huarere, ki ngā titonga ā-hiko e puta matapōkere noa ana i ngā huringa mataora o te paemahana, o te ua me te hukarere. E whakaputa ana ēnei mahinga toi i ngā hihi mai i te hahana o te ao tōrangapū me te ao kikokiko o ō mātou motu e āia ana e ngā maruwehi o Te Moana-nui-a-Kiwa. Kua turakina te mātauranga o te ao pūtaiao e ia mahinga toi. He mea tono kia kitea ētahi atu momo mātauranga e pā ana ki ngā huringa o te āhuarangi.