→ Tirohia te mahinga toi ki konei
Haupapa: Kei te whakahuihui te Chilled Breath of Rakamaomao i te mātanga o ngā awa kōpaka, i a Heather Purdie rātou ko te ringatoi/kaihoahoa puoro, ko Rachel Shearer (nō Rongowhakaata me Te Aitanga a Māhaki), ko te ringatoi kiriata, ko Janine Randerson, ko Ron Bull te māngai kōrero nō Kāi Tahu, nō Kāti Māmoe, me Waitaha, ko ko Stefan Marks hoki he kaiwhakarite kaupapa. Kei te waihanga mātou i tētahi "pūrongo huarere" mai i te awa kōpaka o Haupapa. He tere rawa te tupu o tēnei awa kōpaka o Aotearoa, he mea hanga nā te putanga atu o te hau o te maunga tupua, o Aoraki, i a ia e takatū ana ki te kōrero. Kei te whakanui mātou i te "hau" o Haupapa, arā, ko te haukū, ko te hā, ko te hau pupuhi, ko ngā roimata me hihiri o te ora. He whanaunga a Rakamamao rāua ko Aoraki, waihoki koia tētahi o ngā kaitiaki o te hau me te huarere.
Mā te takoha atu me te whakarongo ki ngā toi oro me ngā toi ataata, ka whakatata atu tātou ki a Haupapa te tupuna, ki a Haupapa te tupua. Kua mau ngā mirumiru moroiti o te hau tawhito me te kōhauhau ki roto i te awa kōpaka o Haupapa, arā, ko te hau moana, ko te hae, ko te hauhā me te mewaro, waihoki ko ngā pungarehu nō ngā ahi tupua o ngā ngahere o Ahitereiria. E areare ana ō tātou taringa ki te awa kōpaka – ki ngā kōrero tuku iho a Kāi Tahu, ki ngā taputapu a te ao pūtaiao, ki ngā pūrere orowai me ngā mata o ngā kāmera moana, kia rongo pīkari te taringa, kia kite mārika ngā whatu i te mea ngaro.
Ka rere aunoa atu ngā kōrero mataora ā-ipurangi i te roanga o te weheruatanga o te Kōanga me te Ngahuru o te tau 2022 (23 o Hepetema 2022 – Nōema 2022) e waihanga ana i tētahi toi ā-ipurangi mai i ngā raraunga e pā ana ki te hau, mai i ngā whakaahua o ngā maramara kōpaka kei raro i te moana me ngā hopukanga ā-oro nō te wai. E whakaahuatia ana ēnei āhuatanga e ngā tauira tūrehurehu nā ngā iarere mai i a Aoraki me te awa kōpaka o Haupapa. Kua tuituia ngā oro me ngā whakaahua e te reo o Ron Bull, e tūhonohono ana i ngā whakaahua ki ngā kupu o Kāi Tahu me ngā ingoa o ngā tūpuna. Kei te whakarongo tātou ki ngā tauira o te huarere mā te manawataki o ngā tauira raraunga, mā te reo me ō tātou taringa.
Nā te huringa tere o te awa kōpaka o Haupapa ki te horanga wai kirikiri nunui, arā, ki te roto o Haupapa kei te taha whakararo, kei te āta kite tātou i te parekura nui e hua mai ana i te āhuarangi. Ko te tirohanga tēnei mai i te pari o te rua. Kua mimiti te wai ki ētahi takiwā o ō tātou nei motu. Kei te ngaro haere ngā awa kōpaka, kei te pā mai te waipuke, te marangai, e tūtaki ana ngā horonga whenua ki uta ki te pikinga o te moana ki tai. Kei te heke haere te whenua, kia hoki anō tātou ki te māpuna nui nō tō tātou orokohanganga.
Press
→ Te Ao Māori News – Haupapa art exhibition highlights the dramatic changes in glacier landscape | Te Ao Tapatahi
→ Pantograph Punch – Aroha for the Glacier
Ngā ringatoi
Ron Bull
Ko Ron Bull te Tumuaki Whakaako o Te Kura Matatini ki Otago. He mema ia nō te Kaihaukai Art Collective, ā, kua whakaputaina e rāua ko Simon Kaan ngā whakwhitinga toi ā-pāpori mō te kai ki Aotearoa me rāwāhi, arā, ki te International Symposium of Electronic Arts (ISEA), ki Te Papa Tongarewa hoki. He kaipupuri ia o ngā mātauranga tuku iho o Kāi Tahu, he mātanga reo anō hoki. Kua mahi ngātahi ia ki te taha o ngā ringatoi pērā i a Alex Monteith. He kairangahau ia e pā ana ki ngā mahinga ngātahi me ngā whakawhitinga o ngā ahurea rerekē mō ngā toi ā-iwi e pā ana ki ngā kōrero ā-rohe.
Stefan Marks
He Creative Technologist a Stefan Marks ki te School of Future Environments ki Te Wānanga Aronui o Tāmaki Makau Rau. Ko āna kaupapa rangahau matua ko ngā mahinga ngātahi ki te whakawhānui i te ao tūturu (XR) me ngā whakaaturanga rarauranga, arā, hei tāna, ko "ngā pakipūmeka ā-raraunga". Kei te waihanga a Stefan i ngā rauemi ki te huri i ngā kōrero raraunga ki ngā mahi ataata, ki ngā mahinga oro me ētahi atu momo pārongo kia kite, kia tūhura, kia mārama te hinengaro tangata ki ngā tauira me ngā momo tūhononga o te taiao. Ko ētahi o āna kaupapa raraunga ko te rū whenua, ko te pongaihu o te tangata me te waihangatanga o tētahi whatunga roro hou.
Heather Purdie
He mātanga awa kōpaka a Heather Purdie ki Te Whare Wānanga o Waitaha. He pūkenga rangahau ia e pā ana ki te tauritenga o te rahi o te awa kōpaka, ki ngā huringa whānui me ngā huringa nui o te āhuarangi e arotahi ana ki ngā maunga kōpaka ki Te Tiritiri-o-te-moana. Kei te whai ia i ngā huringa o ngā awa kōpaka nā ngā huringa o te pae mahana. I te wā tata nei, kua tūhura ia i ngā huringa tere o ngā roto kōpaka me te pānga o ngā kōawaawa tio ki te hanganga o te awa kōpaka. Rite tonu tana hokinga atu ki te awa kōpaka o Haupapa me te Roto o Haupapa ki te taha o ētahi kairangahau e whaiwhai haere ana i ngā pārongo e puta mai ana i taua takiwā.
Janine Randerson
He ringatoi kiriata a Janine Randerson, ko tāna, he waihanga i ngā kiriata 16mm, i te toi oro me ngā toi ā-ipurangi. He nui āna mahinga toi ki te taha o ngā mātanga pūtaiao me ngā rōpū ā-hapori. E arotahi ana tana pukapuka, ko Weather as a Medium: Toward a Meteorological Art (MIT Press 2018) ki ngā mahinga toi o te ao hou e whai ana i te kaupapa o te huarere o nāianei, ā ngā tau e heke mai ana hoki. Kei te whakahaere hoki a Janine i ngā whakaaturanga toi, i ngā huihuinga me ngā whakaaturanga kiriata.
Rachel Shearer
Kei te tūhura a Rachel Shearer i te toi oro mā te huhua o ngā kaupapa oro, arā, ko ngā toi puni, ko ngā titonga, ko ngā hopunga oro, ko ngā tuhinga me ngā mahinga ngātahi ki te waihanga oro, ki te tito oro rānei mō ngā kiriata me ngā huihuinga oro. He kaiwhakamātautau toi puoro ia, ā, kua whakaputaina e ia ētahi whakaaturanga oro ki konei, ki te ao whānui hoki. Kua whanake mai ngā mahi a Shearer i āna rangahau e tūhura ana i ngā tikanga e pā ana ki ngā oro o Papa i te ao Māori, i te ao Pākehā anō hoki. Arā noa atu āna tono ki te waihanga i ngā toi puni oro ki ētahi wāhi motuhake mō te iwi whānui, pērā i te toi puni tūroa ara-iwa o The Flooded Mirror ki te takutai o te tāone o Tāmaki Makaurau.